Cebu City- Mipatong na sa 3 mil ang gidaghanon sa mga nataptan sa coronavirus disease o COVID-19 dinhi sa Central Visayas, segun pa sa uwahing record sa Department of Health o DOH 7.
Sumala pa sa Resu o Regional Epidemiology & Surveillance Unit sa DoH 7, miabot na og 3,633 ka pasyente ang naghambin sa virus hangtod niadtong Hunyo 5.
Sa maong ihap, 1,381 ang gi-classify nga discharged na nagpasabot nga naulian na sa impeksyon.
Samtang laing 1,547 ang nagpabilin sa home isolation o sa quarantine facilities ug 635 ang naadmit sa ospital.
Gawas niana, 70 usab ang natalang namatay, sumala pa sa report nga pirmado ni Dr. Jaime Bernadas, director sa DOH-7, ug ni Dr. Eugenia Mercedes Cañal, cluster head sa Resu.
Hinuon, giingon sa taho nga mokabat og 60 o 86 porsyento sa mga namatay naggumikan sa laing hinungdan o giila nga ‘incidental deaths.’
Nagpasabot kini nga 14 porsyento lang o napu sa 70 ka patay sa coronavirus ang aktuwal nga namatay sa virus.
Sumala sa report sa DOH 7, 60 ka incidental deaths ug 10 ka COVID-related deaths ang gitaho diin kadaghanan sa incidental deaths gikan sa Cebu City nga adunay 34 ug sa Cebu province nga may 15.