Niabot na og 18,173 kabuok mga indibidwal ang nasita sa kapulisan sa probinsya sa Sarangani tungod sa dili pagtuman sa mga personal health protocol. Basi kana sa datus sa PNP Sarangani pinaagi ni Lt. Col. Neil Wadingan, ang labaw sa Sarangani Provincial Contact Tracing Support Group gikan Abril 30 hangtud Oktubre 31.
7,904 sa mga nahisgutan ang wala gasuot og face mask, 1,085 ang naglatagaw taliwala sa curfew, 6,996 ang wala mutuman sa physical distancing, ug libo kapin usab ang nisupak sa uban pang kamanduan sa LGU sa safety protocols.
Pipila na kanila ang naka-multa ug naka-community service. May gikasuhan pud tungod sa dili pag-ila sa otoridad ning panahon sa pandemya, nakasupak sa gilatid sa Revised Penal Code ang ginatawag nga “resistance and disobedience to persons in authority and their agents.”
Gibutyag ni Police Col. Michael Lebanan, ang provincial director sa Sarangani Provincial Police Office, nga magpadayon lang sila pagpatuman sa mga balaod ug palisiya batok COVID-19 sa ilang Oplan Sita ug Oplan YawYaw, sa pakig-alayon ngadto ni Governor Steve Chiongbian Solon ug sa pito (7) ka mayor.
Una nang gipamahayag ni Sarangani Governor Solon nga disiplina ang kinahanglan aron mabatasan ang pagtuman sa personal safety protocol para nga bisan unsa pa mang balatian nga makatakod, dili lang Coronavirus, andam pirme ang kaugalingon. Kung mahimo na nga kinaiya ang pagsuot og face mask ug face shield, paglikay sa panagtapok sa tao ug paghinlo sa lawas, dili na makaingon pa nga mabag-uhan sa gipatuman nga mga patakaran sa gobyerno. (Provincial Information Office – Sarangani)