National holiday karong adlawa, adlaw nga Byernes, Hulyo 31, balaanong pagtamod sa Eid’l Adha kon Feast of Sacrifice sa atong mga kaigsoonang Muslim.
Ang mga opisyales sa probinsya sa Sarangani gipangunahan nila Governor Steve Chiongbian Solon, Vice Governor Elmer De Peralta, tanang board member ug mga mayores ug sila Senador Manny ug Congressman Ruel Pacquiao, ang nitimbaya sa kasaulugan.
Ang Eidl Adha ang usa sa duha ka dagkong Islamic holiday, nauna ang Eidl Fitr. Sagradong paghinumdom ang Eidl Adha sa pagsakripisyo ni Propetang Ibrahim, naila sa mga Kristyano nga Abraham, aron mapakita ang iyang dakong pagtuo sa Labaw nga Makagagahum pinaagi sa paghalad sa iyang anak. Inay ang iyang anak nga si Ismael subay sa pagtulun-an sa relihiyong Islam, usa ka karnero ang gihalad human nasukod ug napamatud-an sa Buhing Dyos ang hugot nga pagsalig ni Propetang Ibrahim.
Mapasalamaton karon ang Muslim community sa probinsya sa Sarangani gumikan sa unang higayon, napili sa usa ka Moro group naka-basi sa nasud Singapore ang Sarangani Province sa ilang proyekto gitawag nga “Qurban (kur-ban) Project 2020. Pang-apud apod kini og Halal nga karneng kanding sa mga kaigsoonang Moro alayon sa selebrasyon sa Eidl Adha human sa mga sambayang.
Pinaagi sa Halwani Services Singapore, sa pag-ayuda sa Al Ihsan Resource Center, one hundred one (101) kabuok mga himsog nga kanding ang sumbalion. Una napud silang nanghatag og mga libro ug uban pang learning materials sa mga Madaris Arabic school sa Sarangani.
May duha (2) pa nga baka ang gidungag gikan sa uban pang Moro partner individuals kauban ang Moro Youth Union of the Philippines sa paglihok ni Doctora Sitti Maryam Dilanggalen. Naka-ayuda pud ang Maguindanaon Development Foundation Incorporated ug ang Sarangani Provincial Police Office.
Segun ni Asma Akmad sa Governors Commission on Moro Affairs, gipakapinan pa kini og mga sinakong bugas sa Sulong Kapayapaan program ni Governor Solon.
Iagi sa mga partner organization-association ang mga karne aron sila na usab ang muhatag sa mga panimalay, ngadto sa mas labing nanginahanglan hilabi na sa mga development partner sa pobinsya sa Sarangani.
Samtang, laing pagmaya napud sa Moro community sa Sarangani Province human nga takdang ipatindog ang Halal slaughterhouse, ibutang sa lungsod sa Malapatan.
Matud pa ni Jennifer Kamid, ang program manager sa Kalinaw Unit, labing una kini nga Halal slaughterhouse sa entiro Region 12 nga naka-basi sa international standard (Triple A standard). Una ng na-establisar ang sa Cotabato City nga Double A standard. Paga-pondohan kini sa Department of Agriculture og Baynte-singko Milyones ka pesos (₱ 25M). May counterpart ang munisipyo sa Malapatan sa pamunuan ni Mayor Jun Sumbo og ₱ 2.5 Milyon ka pesos, mudungag pa og laing ₱ 2.5 Milyon ka pesos ang opisina ni Governor Solon.
Dakong pabor kini sa mga namuhi og kanding ug baka. Nitabang matud pa sa technical assistance sa paghan-ay sa slaughterhouse sa Sarangani ang City Government sa Cotabato City sa pamunuan ni Mayor Cynthia Guiani-Sayadi hilabi na si Cotabato City Administrator Dr. Danda Juanday.
Nakita sa Department of Agriculture Region 12 ang potential sa Sarangani sa Halal slaughterhouse gumikan andam na matud pa ang Muslim community sa probinsya sa Halal livestock production.
(Sarangani PIO)