Mipaabot sa iyang dakong pagpasalamat si Dr. Emilia Monicimpo, ang Regional Director sa Department of Health (DOH) Zamboanga Peninsula-Center for Health Development ngadto sa kagamhanang probinsyal sa Zamboanga del Norte ilawum sa administrasyon ni Governor Roberto Uy gumikan sa kalampusan sa pagpahigayon sa Sabayang Patak Kontra Polio Round 3 kaniadtong Hulyo 20-Agosto 9, niining tuiga.
Kini ang gipaabot ni Dr. Monicimpo pinaagi sa sulat karong bag-o ngadto ni Governor Uy pinaagi usab ni Dr. Esmeralda Nadela, ang OIC sa Provincial Health Office.
Dugang ni Dr. Monicimpo nga gumikan sa hugtanong suporta sa gobernador sa maong programa, ang rehiyon 9 nakakab-ot ug 97% ning maong kampanya.
Sa maong kalambuan, kini makapaseguro nga mapakgang ang pagkuyanap sa poliovirus sa kabarangayan, lungsod, syudad ug mga probinsya.
Sa kasamtangan, adunay measles and rubella outbreaks o tipdas ang gikataho na usab.
Ang kaso sa tipdas dinhi sa nasud ug sa rehiyon ang mikuyanap na sukad pa kaniadtong tuig 2017 ngadto sa 2019.
Bisan paman sa gihimong Outbreak Response Immunization (ORI) ug Supplemental Immunization Acitivity (SIA) ang pagkuyanap sa measles virus ang nagapadayon hangtud karon.
Kini nagpabiling maoy nag-unang hinungdan sa Vaccine Preventable Disease (VPD) pagsakit sa kalawasan ug pagkamatay.
Aron matubag ning maong measles population immunity gap, adunay ipahigayon nga Measles-Rubella Supplemental Immunization Activity karong Oktubre 26-Nobyembre 25, 2020 sa tibuok nasud.
Ang mabakunahan sa Measles Rubella (MR) vaccine mao ang mga bata nagpangidaron 9 anyos-59 ka bulan dili igsapayan ang ilang immunization status.
Niini, si Dr. Monicimpo ang nagkanayon sa iyang sulat ni Governor Uy nga ilang paningkamutan nga makakab-ot sa 95% nga target sa mga bata nga mabakunahan niini.
Busa, giawhag na usab sa maong regional director ang suporta sa gobernador ning maong programa.
Nasayran nga si Governor Uy hugtanong nagsuporta sa tanang health programs nga gipatuman sa probinsya ilabi ning panahon nga nag-atubang kita sa pandemya gumikan sa makamatay nga COVID-19 virus.
(Public Information Office/ OIC Lyza Bautista, RPN DXKD Dipolog)
