Cebu City- Niay maayong balita alang sa mga membro sa Government Service Insurance System kun GSIS taliwa sa krisis nga hatod sa outbreak sa coronavirus disease kun Covid 19.
Kini tungod kay sa dili madugay motanyag ang GSIS og emergency loan sa mga sakop niini.
Sa news release nga gi-post sa Facebook sa GSIS sa miaging adlaw, ang presidente ug general manager nga si Rolando Macasaet miingon nga ila kining himoon agig sanong sa awhag ni Sen. Bong Go pag-ayuda sa mga membro ug pensyonado.
Gipasalig ni Macasaet sa publiko nga ang state pension fundmolugway og hinabang sa mga sakop ug mga pensyonado.
Midugang siya nga naghimo pa silag adjustment sa ilang system aron pag-activate sa tibuok nasod nga tanyag sa emergency loan.
Mitanyag ang GSIS og P20,000 nga emergency loan sa mga membro ug pensyonado nga may tubo nga 6 porsyento ug impason sud sa tulo ka tuig.
Una niini, si Sen. Go, nga chairman sa Committee on Health & Demography, miagni sa  GSIS nga i-waive ang penalty sa nalangay nga remittance, i-release og sayo ang pension ug mo-grant og emergency loans.
Sumala pa ni Macasaet, naka-grant na ang GSIS og lugway o grace period sa tanang premium remittances ug loan payments nga payable karong buwana ngadto sa Mayo 10 nga walay penalty.