Nakigduyog sa makausa pa ang mga opisyales sa probinsya sa Sarangani sa pagpanguna ni Governor Steve Chiongbian Solon sa pag-obserba sa sagradong pagtamod sa Kristohanong katilingban sa Semana Santa. Segun ni Governor Solon, ang Kwaresma ang paghinumdom sa pagpakasakit ni Ginoong Hesukristo sa krus alang sa pagtubos sa kasal-anan sa kalibutan.
Duha (2) ka tuig na nga gisaulog ang Semana Santa nga pinug-ngan ang lihok sa mga manimbahay tungod sa nagpadayong hulga sa Coronavirus. Nagtuo ang Gobernador nga kining nagpadayon karon nga pandemya ang malampasan sa katawhan kung padayon nga mutuman sa health protocols sa gobyerno ug labaw sa tanan ang pagsalig ug pagsangpit kanunay sa Labaw nga Makagagahum.
Susama sa pagkabanhaw sa Ginoo nga simbolo sa bag-ong paglaum human sa kasakit ug pag-antos, andam dapat ang katawhan sa paghinulsol ug pagsakripisyo aron makab-ot ang sobra tuig na nga gina-ampo nga mubalik sa normal ang pagpuyo. Bugtong ang Kahitas-an lang ang nasayod sa padulngan sa kasamtangan nga henerasyon.
Gani, wala pa man nabakunahan ang tanan batok sa orihinal nga bersyon sa Coronavirus, nanggutho napud ang mga bag-ong variant gikan sa mga nagkadaiyang nasud. Normal kini nga kalihukan sa virus nga adunay mahitabo nga mutation kung nag-sige pa kini sa pagtakod sa dugay na nga panahon.
Ni-awas na ang mga hospital karon sa kauluhang Maynila tungod sa kadaghan sa pasyente. Pinakaulahi nga natakdan og Coronavirus mao mismo si kanhing presidente Erap Estrada. Samtang, patay na ang sikat nga mang-aawit nga si Claire de la Fuente konektado gihapon sa COVID-19.
Hugot na lamang ang pagbantay nila Governor Solon kuyog ang pito (7) ka mayor, Vice Governor Elmer De Peralta, mga board member, sila Senador Manny ug Congressman Ruel Pacquiao, ug tanang frontliners nga dili gyud maka-katap kini sa Sarangani Province bisan pa nga ang Sarangani ang adunay pinakagamay nga total positive cases sa entiro Region 12.
Sa gipagawas nga executive order sa Gobernador, nagpabilin ang palisiya sa probinsya sa Sarangani nga magkuha og negative RT-PCR swab test result ug mupailalum sa Mandatory Quarantine ang mga ROF kon Returning Overseas Filipinos.
Gipaniguro na lamang ni Col. Michael Lebanan, ang labaw sa Sarangani Provincial Police Office, lakip na ni Lt. Col. Romeo Galgo, ang bag-ong deputy provincial director for operation nga mao karoy nangulo sa Provincial Contact Tracing Support Group, nga anaa ang PNP Sarangani ug mga force multiplier katugbang ang kasundaluhan sa pag-alalay sa mga LGU sa padayong pagpatuman sa safety measures.
Wala man gibawalan sa pag-obserba sa mga bala-anong adlaw apan sabton dapat matud pa sa mga residente nga gidid-an usa gyud ang panagtapok sa mga tao. Dili kalimtan ang face mask, face shield, dos metros nga physical distancing ug paghinlo sa lawas.
Gibutyag ni Ms. LangLang Purisima sa Sarangani Provincial Tourism and Investment Promotion Center nga hugot gipatuman sa mga tourism destination hilabi na sa mga beach resort ang health protocols, limited venue capacity ug checkpoint requirements, ubos sa pag-monitor sa mga aktibong mayor, municipal tourism office ug kapulisan. (Provincial Information Office – Sarangani)