Radio Philippines Network
DXDX GenSan News Provincial News

Governor Solon Gipangunahan Ang Inagurasyon Sa Malungon Municipal Hospital Isip Hingpit Na Nga Level I Hospital

Mismong si Governor Steve Chiongbian Solon ang nanguna sa inauguration and thanksgiving sa Malungon Municipal Hospital isip hingpit na nga Level I hospital ato lang adlaw nga Huwebes, Abril 8.

Gitambungan usab ang seremonyas nila Dr. Hector Zenon Leonardo Malate, ang labaw sa PhilHealth Region 12, Department of Health Sarangani-Gensan Provincial Director Dr. Butch Dulduco, Mr. Nol Valila, ang nangulo sa PhilHealth Sarangani-Gensan, Ms. Merlita Gludo, ang chapter administrator sa Red Cross Sarangani-Gensan, lakip na ang partner NGO nga Mahintana Foundation, ug mga aktibong board member nga sila Board Member Irish Arnado, Board Member Joseph Calanao, Board Member Tata Galzote ug Board Member Dr. Ruiz, apil na si Malungon IPMR Municipal Councilor Monard Galgo.

Nahimong emosyonal ang management sa Malungon Municipal Hospital sa pagpanguna ni Chief of Hospital Dr. Allen Geoffrey Española, hilabi na si Administrative Officer Victoria Dazo, gumikan natuman na matud pa ang dugay na nilang gipangandoy nga ma-upgrade ang nag-inusara nga pampublikong balay tambalanan sa lungsod sa Malungon.

Kana tungod matud pa sa vision, inspirasyon, paggiya ug hugot nga suporta nga gihatag kanila ni Governor Solon kauban si Vice Governor Elmer De Peralta ug mga board member, Department of Health, Sarangani Provincial Health Office sa opisina ni Dr. Arvin Alejandro ug mga departamento sa Kapitolyo, PhilHealth, Red Cross, Mahintana, ug ang LGU Malungon sa pagdumala ni Mayor Tessa Constantino.

Level I hospital na ang mga municipal hospital sa Kiamba ug Glan, ikatulo karon ang Malungon Municipal Hospital nga gi-deklara usab sa DOH nga Level I hospital. Pwede na nga maka-opera, pwede napud maka-abono og dugo.

Gani, gibutyag ni Chief of Hospital Dr. Española nga niabot na sa trese (13) ka mga indibidwal ang malampuson nga ilang na-operahan sulod sa Malungon Municipal Hospital. Pinakaulahi nilang na-operahan ang pagpanganak pinaagi sa Caesarean section sa mga kambal nga bata.

Sa habig ni Governor Solon, mapasalamaton kini nga may katumanan ang gi-plano niini tuig 2013 pagsugod sa iyang pangatungdanan isip gobernador ilalum sa Sulong Kalusugan program kauban ang Sangguniang Panlalawigan, sa pagsuporta kaniadto sa kanhing congressman ug karon Senador Manny Pacquiao ug ni Congressman Ruel Pacquiao, nga pakusgon ug palambuon ang mga municipal hospital sa Sarangani Province, taliwala sa nagpadayon nga pandemya, aron dili magpunsisok sa provincial hospital.

Apan gitagaan pud og bili ni Governor Solon ang papel sa mga health worker gikan sa mga doctor nila Dr. Española, Admin Officer Dazo, nurses, hangtud sa pinakaubos nga ranggo sa hospital nga kung dili pinaagi sa ilang tinuuray nga pagserbisyo sa mga pasyente, dili mudako ug ma-improve ang hospital nga ilang gi-alagaran.

Labaw sa tanan, ang dakong pag-ayuda sa Department of Health sa LGU Sarangani pinaagi sa dinagkong pondo. Ug sa bendisyon sa Ginoo nga padayong gabubo og mga grasya aron matuman ang mga handum sa katawhan.

Si Mayora Constantino nagpadayag sa iyang pagpasalamat sa liderato ni Governor Solon ug sa padayong partnership sa Sarangani Provincial Government ug LGU Malungon tungod nakab-ot na matud pa ang dugay na nga gitinguha sa mga taga-Malungon. Nanghinaot kini nga daghan pa ang mahatag nga serbisyong pang-hospital aron daghan pa ang matabangan. (Provincial Information Office – Sarangani)

Related posts

DILG Issues Guidelines For The Conduct Of Barangay Assembly Amid Pandemic

RPN

Patient Who Tested Negative Twice For COVID-19 Dies Of Stroke

RPN

Senior Citizen NPA Yields To Reunite With Family

RPN