Compostela Valley Province––Gipanguluhan mismo ni Gov. Jayvee Tyron Uy ug mga kauban nga sila DOST Comval Provincial Dir. Kenneth Barroga, UP-Diliman Research Team Head Dr. Herman Mendoza, ug PLGU PENRO Eugene Alaba ang Operational Testing sa “P38 Million Gold-Copper Mineral Processing Plant” nga gipabuhat sa Department of Science and Technology(DOST) diha sa Brgy. Katipunan, Nabunturan, Comval.
Ang bag-o nahumang Operational Testing maoy unang gitambongan sa gobernador sayo sa buntag niadtong Agosto 8,2018 aron masayran kon puwede na ba magamit sa mga katawhan ang teknolohiya nga dakog mabuhat aron maprotektahan ang kinaiyahan nga usa sa mga labing importanteng component sa gipakusog niyang Green Mining Technology sa probinsiya.
Ang Comval Province apil sa pipila ka mga probinsiya sa nasud nga gipiling Pilot Site sa DOST sa P38 Milyones nga “Integrated Gold-Copper Mineral Processing Plant” nga sa pagkakaron giilang usa sa pinakabag-o ug pinaka modernong kahimanan sa industriya sa mina nga tungod environment friendly ug taas ang level sa accuracy gilaomang dakog matampo sa gitinguhang kalampusan sa “Better Mining Policy” nga hugtanong gipatuman ni Gov. Tyron Uy ug SP Members sa pagpanguna nila ni Vice Gov. Manuel “Way Kurat” Zamora ug Senior Board Arturo “Chiongkee” Uy.
Sa milabayng tuig gipahibalo ni Gov. Tyron Uy ang dako niyang kalipay tungod nakauban niya ang mga kadagkoan sa DOST sa gihimong pagbisita sa padayon pa gibuhat nga “Gold-Copper Mineral Processing Plant” sa kinatibuk-ang kantidad nga P38 Million nga giilang Environment Friendly tungod dili mogamit sa makahilong chemicals sama sa Mercury ug Cyanide.
Samtang, panahon sa paghatag ni Vice Gov. Zamora sa mensahe sa gobernador iyang gipahibalo sad nga bisan siya nalipay gyod og dako human nasayran nga apil diay ang Comval sa mga probinsiya sa nasud nga gihatagan sa DOST sa usa ka bag-o ug giiliang pinakamodernong “Mineral Processing Plant”.
Matud pa niya nga luyo sa pagka-environment friendly, sangkap kini sa kapabilidad nga labaw kaayo sa daang “Mineral Processing Plants” tungod moabot sa 80% ang recovery kon kayang makuha nga bulawan ug uban pang mga minerales kompara sa karaang planta nga moabot lang sa 50% ang pinakataas nga recovery luyo sa paggamit sa mga makahilong chemicals.