El gobierno local ya entrega valor de P2.1 millones cheke como incentivos con mga atletas Zamboangueño quien ya gana medalla na IWG World Championship na Bahama, Bahrain y na Asian Youth y Junior Weightlifting Champions na Doha Qatar.
El Alcalde John Dalipe ya entrega con el cheke del Viernes cuando ya visita de cortesia el mga atletas con el oficial na su oficina.
Si Rosegie Ramos, el dos veces medalista de plata na IWG World Championship, ya recivi premio de P200,000. Si entrenador, si Allen Jayfrus Diaz ya recivi P100,000 por su guia y suporta.
El otro medalistas na 2024 Asian Youth y Junior Weightlifting Championship igualmente ya recivi de ila incentivos que ya facilita el Oficina de Division Deportes del Ciudad y Oficina de Tesoreria del Ciudad.
El mga recipientes y el de ila corespondiente incentivos amo el mga siguientes: Princess Jay Ann Diaz, bronze, P50,000; Rose Jean Ramos, plata,P100,000; Alexsandra Ann Diaz, 2 medallas de bronze, P100,000; Jhodie Peralta, 2 medallas de oro y un plata, P350,000; Angeline Colinia, un medalla de plata y uno de bronze, P150,000; Aldrin Colonia, 2 medalla de oro y un plata, P350,000; y, si Rosalinda Faustino, 2 medallas de bronze, P100,000.
El mga entrenadores de ila, canda Gregorio Colinia y Allen Jayfrus Diaz ya recivi tamen P300,000 cada uno como premio por el de ila contribuciones na triunfo del mga atletas.
Si Dalipe ya comenda con el mga atletas y entrenadores por el de ila dedicacion y trabajo duro enfatizando el continuado suporta del ciudad para el desarollo del deportes local.
El concurso na Bahama, Bahrain ya conduci del Deciembre 6 hasta 15 y na Doha, Qatar desde Deciembre 19 hasta 25, 2024. (B. Garcia)