Personal nga inawat ni Ilocos Norte Gov. Matthew Marcos Manotoc ti maysa nga ambulansia nga indonar ti pamilya Alcid iti gobierno probinsial.
Kagiddan daytoy, indanon met ti gobernador ti nalaus a panagyamanna iti nasao a pamilia gapu iti kinasayaat ti panagpuspusu da a nangibinglay ti adda kadakuada.
Kuna ti gobernador a dakkel a tulong daytoy kadagiti kaprobinsiaan nangruna ita a panawen ti pandemia.
Ti nasao nga ambulansia ket immay inyawat a mismo dagiti agkakabsat a da Mr. and Mrs. Carol Barbes Alcid, Mrs. Tintin Alcid-Apostol ken Mr. Jao Miguel ken ni Gob. Marcos iti sango a mismo iti kapitolio.
Kabayatanna, inpalgak ni Mrs. Tintin Alcid Apostol a napanunutan ti pamilya da nangruna iti kabsat da a ni Mr. John Paul ti mangidonar iti ambulansia tapno adda iti nayon nga usaren dagiti maitaray iti ospital.
Daytoy ket kalpasan a ti pamilia da ket nagsakit da met iti covid pakairaman ti anak na nga agtawen laeng ti dua ti arinunus iti bulan ti Hunyo.
Kunana a nakita da iti rigat iti awan ti pagluganan a mapan agpa swab test kasta metten maitaray iti ospital rason nga ambulansia ti napanunut da nga idonar iti probinsia.
Mamati ni Mrs. Alcid – Apostol a dakkel a tulong iti nayon nga ambulansia saan laeng a taga Laoag City ngem ketdi iti intero nga Ilocos Norte.
Mangnamnama nga ad-adu pay a grupo dagiti negosiante ken pribado nga individual ti mainspirar ken tumulong kadagiti kakailian kangrunaanna kadagiti maapektaran ti covid.
Maipalagip nga itay kallabes, nangipaay met ni Mr. Bryan Alcid kadagiti Personal Protective Equipment wenno PPE’s face shield, face mask, gloves ken dadduma pay iti biang ti Mariano Marcos Memorial Hospital and Medical Center.
(Rodrigo Sadian, RPN DZRL Batac OIC)
(Source: Provincial Government of Ilocos Norte)