Nabenipisaran ti inem a pasiente ti Department of Orthopedic ti mariano marcos mem. Hospital and medical center wenno MMMH&MC iti medical mission nga insayangkat dagiti doctor ti Singapore heneral hospital wenno SGH
Inlawlawag ni Dr. Marjoie Sierra, Officer In-charge ti nadakamat a departamento ti hospital a natingting a naimbag no sasino dagiti agkasapulan ti tulong kadagupan dagiti pasiente ti department of orthopedic.
Impalgakna a daytoy ti kaunaan a gundaway a nangisamngakat ti “ortho mission” dagiti doctor manipud idiay Singapore.
Segun kenkuana, kadagupan ti sangapulo ket maysa a delegasyon ti SGH ket innem kadagitoy ti doctor.
Imbatadna a nainaw ti pannakaisayangkat ti nasao a medical mission idi bulan ti pebrero. Maninaig iti daytoy, impadanon ni sierra ti panagyamanna ken Gob. Matthew Marcos Manotoc a nangasikaso iti iyuumay dagiti doctor ti SGH ditoy probinsia kangrunaanna iti MMMH&MC.
Kunana a mabalin a saan a naileppas dagiti naruay a proseso a nasurot sakbay a naikkan ti gundaway dagiti doctor ti SGH a nangisayangkat ti “ ortho mission” no saan a timmulong ti gobernador.
Impalgakna a no saaan timmulong ni Go. Marcos Manotoc ket mabalin a naisayangkat ti nasao a “surgical mission” iti sabali a lugar ditoy pagilian. Inlawlawagna a malaksid iti operasyon a naisayangkat ket dakdakkel a banag ti naisuroda kadagiti doctor iti MMMH&MC.
Imbatadna a babaen iti daytoy, no addanto pay dagiti pasienteda nga agkasapulan ti maiyasping nga operasyon ket kabalinanton dagiti local a doctor nga isayangkat. Innayonna a saan nga agpatingga iti operasyon ti tulong nga ipaay dagiti doctor manipud Singapore kadagiti pasiente ngem agingga a makarekobre dagitoy.
Author: April Joyce Gonzales
Source: MMMH&MC
