Pinasingkedan ni Gob. Matthew Marcos Manotoc a nangrugin idi Sabado ti “regional flight” ti Phil. Airlines nga agdisso iti Laoag International Airport Impalgakna a daytoy ti kaunaan nga international flight a nagdisso iti nadakamat nga erupuerto.
Inlawlawagna a kiniddaw ti PAL ti panagdisso dagiti eroplanoda iti LIA gapu iti panagkurkurang dagiti mausar nga international airports gapu iti problema idiay Cebu.
Segun iti gobernador, nagsardeng ti operasyon ti international airport idiay Cebu rason a kiniddawda a mapagbalin a “regional hub” ti Ilocos Norte.
Mainaig iti daytoy, kunana nga ibilang na daytoy a dakkel nga oportunidad para kadagiti hotel, transportasyon ken dagiti caterers.
Mangnamnama ti gobernador a makatulong daytoy ken natalged ti pannakaisayangkatna ditoy probinsia.
Inbunannagna a nupay adda dagiti makitana a rumbeng pay laeng a mapasayaat ket maibilang a naannayas ti kaunaan a regional flight a nagdisso iti LIA.
Imbatadna a maysa kadagiti kalikagumna a maipatungpal ket ti pannakapaalisto ngem sigurado a natalged a proseso para kadagiti agsangpet a pasahero.
Inlawlawagna a masapul nga ag-quarantine nga umuna ditoy probinsia dagiti pasahero ken iti kanito a negatibo ti RT PCR test dagitoy iti panag- Swab test da iti maikapito nga aldaw ket mabalinen dagitoy ti agawid iti maikasangapulo nga aldaw idinto a mai-isolate dagiti nagpositibo ken masapul a maiyalud-ud iti sangapulo pay nga aldaw ti panagtalinaedda ditoy probinsia.
Innayonna nga adda dagiti sumagmamano a pasahero manipud iti rehion rason a saan unayen nga adayo ti biahe dagitoy idinto a dagiti dadduma ket maipanda idiay Manila babaen met laeng iti PAL.
(Cita Macalipis, RPN DZRL Batac Correspondent)
(Source: Provincial Government of Ilocos Norte)
