Cebu City – Naka angkon si Gob. Gwendolyn Garcia og piang sa iyang wala nga bat-ang human sa iyang pagkadakin-as sa iyang balay sa dakbayan sa Sugbo niadtong Sabado.
Mao kini gipahibawo ni legal consultant Rory Jon Sepulveda uban ni Provincial Health Officer Christina Giango gahpon sa hapon.
Nasayran nga ang 64 anyos nga si Garcia nag-inusara ra pagpuyo sa iyang balay sa siyudad.
Nunot niini, gitambagan si Garcia sa doctor nga magda lang una kinig walker sa iyang paglakaw sud sa unom ka semana ug sungkod sa duha ka semana.
Segun sa medical certificate nga giisyo ni Dr. Jose Antonio San Juan sa Cebu Orthopedic Institute, ipaubos si Garcia sa laing X-ray paglabay sa duha ka semana aron pagsusi sa kahimtang sa iyang bat-ang.
Makita usab sa medical certificate nga adunay osteoporosis si Garcia nga matod pa ni Giango, maoy hinungdan nga dali ra kining maangol.
Hinuon, bisan sa naangkong kadaot, gitataw ni Giango nga maayo ra ang panglawas sa gobernador ug mobalik na kini sa trabaho karong adlawa.
Midugang si Giango nga wa pa siya mahibawo kon ang aksidente makabalda ba sa gitakdang mga out-of-town engagements ni Garcia. (Jhon Tadlip/JTY)
(Source: Cebu Provincial Government)