Dakong kalipay sa mga katawhan sa lungsod sa Glan gumikan nakauna silang nakadawat sa cash assistance ilalum sa programa sa gobyerno nga SAP kon Social Amelioration Program. Singko Mil ka pesos (P5K) kada bulan, Dyes Mil ka pesos (10K) ang kinatibuk-ang makuha sulod sa duha (2) ka bulan.
Atong Miyerkules, natagaan ang mga kwalipikadong pamilya sa Barangay Mudan ug sa Barangay Tapon, Glan. Gani, sila Tapon Kapitan Ronald Canoy ang nagpasalamat ngadto nila Pangulong Rodrigo Duterte, Governor Steve Chiongbian Solon ug Glan Mayor Vivien Yap tungod wala pasagdi matud pa ang mga lumulupyo nga labing naapektuhan sa mga gipatuman nga lockdown tungod sa Coronavirus.
Ug kagahapong adlawa, ang mga barangay napud sa munisipyo sa Kiamba ang nakadawat sa maong emergency cash subsidy, sa pagpanguna kana ni Kiamba Mayor Bogi Martinez.
Sa tibuok Sarangani Province, 59,874 kabuok household/pamilya ang makadawat sa maong ayuda sa DSWD. Suma total, P299.3 Milyones ka pesos ang gigahin sa nasyonal nga panggamhanan sa SAP emergency subsidy alang sa Sarangani, rason nga gikalipay kini ni Governor Solon.
Aminado ang kadaghanan nga ang SAP program ang gikagubtan sa tibuok Pilipinas tungod sa pipila ka mga isyu, sama na lang sa limitadong pagpili ug mahulog nga dili tanang apektado ang benipisyaryo. Hinungdan nga sa mensahe ni Pangulong Duterte atong adlaw nga Lunes, gimanduan niini ang DSWD ug DILG nga magpahigayon og ikaduhang survey aron kadtong wala malista ang matagaan. Segun sa Presidente, dili kini maka-ako nga mamatay ang usa ka Piipino tungod sa kagutom.