Ang dako nga suporta ni Gobernador Bambi Emano ug Provincial Inter-Agency Task Force Chief Dr. Jerie Calingasan nga mapaubos sa Modified Enhanced Community Quarantine (MECQ) ang Gingoog City nakatabang og dako sa pag-ubos sa ihap sa kaso sa Covid-19 sa siyudad.
“Sa walay pagduha-duha nagkonek ta sa atong halangdon Gobernador Bambi Emano through PIATF sa pagpaabot sa tumong sa siyudad sa Gingoog pinaagi sa sulat nga naghangyo kita nga ipaubos ang dakbayan sa Gingoog under MECQ ug mapasalamaton gyod kita kaayo sa fast action sa atong Gobernador nga grabe gyod ka supportive ang Provincial Government kanato,” matud ni Mayor Cañosa.
Matud ni Mayor Cañosa nga nag-plateau ang kaso kon itandi niadtong mga unang adlaw sa bulan sa Hunyo gumikan sa pagpaubos sa MECQ.
Lakip sa gipasalamatan og dako ni Mayor Cañosa ang dakong kooperasyon sa katawhan sa Gingoog City nga kung dili sa ilang pagsunod sa mga gimando nga mga gabayan ug disiplina sa kaugalingon dili molampos ang paningkamot uban ang nagkalain-laing ahensya lakip ang kapulisan.
Matud ni Mayor Cañosa nga anaa si Gobernador Bambi ug PIATF nga kanunay nagmonitor sa ilang sitwasyon ug nagsiguro nga igong doses sab sa Covid-19 vaccines ang mapadala sa ilang siyudad aron mas mapaspasan ang vaccination roll-out.
Sa kasamtangan dako na og porsiyento sa ilang populasyon ang natupokan sa bakuna nga ubos sa A1 to A3 nga level.
Wala usab puas ang mga lakang nga gihimo ni Cañosa uban ni Vice Mayor Peter Unabia sa pakigbatok sa makapatay nga virus ug kadtong wala pa ang pandemya ang kanhi usa lamang ka ambulansya sa Gingoog nadugangan og siyam nga karon nagamit ug napahimuslan og maayo.
Agi usab og pagpangandam labina niadtong ubos ang oxygen concentration ang iyang Administrasyon ubos sa City Disaster Risk Reduction Management Council (CDRRMD) ang nag-procured og high flow heated oxygen concentration nga magamit sa mga balay tambalanan sa Gingoog alang sa mga pasyente nga ubos kaayo og oxygen saturation.
Samtang anaa pa taliwala sa MECQ ang dakbayan sa Gingoog karon panahona naghangyo ug nangalyupo si Mayor Cañosa ngadto sa katawhang Gingoognon nga ipadayon kini nga kooperasyon gumikan ang katawhan sa siyudad maoy labing makabenispisyo nga maluwas sa Covid-19 sa umalabot.
Gipaabot sab niini nga kung magpadayon sa pag-ubos ang kaso sa Covid-19 uban sa walay hunong nga kooperasyon sa katawhan sa dakbayan posibleng mausab ang level sa quarantine classification sa siyudad ug laumang mahugak-hugakan.
(Source: Misamis Oriental Provincial Information Office Facebook page)