34 C
Manila
Tuesday, April 16, 2024

Ginang Emosyonal Nga Nagpasalamat Nila Ni Gov. Uy Ug Cong W. Labadlabad Human Natabangan Sa Iyang Gihambin Nga Sakit

- Advertisement -

Gumikan sa tabang sa Medical Team ni Governor Roberto Uy sa kagamhanang probinsyal, natambalan ang usa ka 59 anyos nga ginang sa iyang gihambin nga sakit.

Si Cristina Saren, lumolopyo sa Galas ning dakbayan ang emosyonal nga nagpasalamat ni Governor Uy pinaagi sa iyang Medical Team human naulian sa iyang balatian kinsa nag-antus sa Uterine Prolapse o pagkabot-bot gumikan sa iyang pag-aswat ug mga bug-at nga butang bisan sa iyang pangidaron.

Gipamahayag ni Cristina nga kung dili gumikan sa Medical Team pinaagi ni Ms. Herdina Crisostomo dili sila basta-basta kasulod sa maong tambalanan ilabi na ning panahon sa pandemya.

Gipasalamatan usab niya si 2nd District Representative Glona Labadlabad sa financial assistance nga P5,000 ug sa P10,000 gikan sa kagamhanang probinsyal.

Samtang ang anak ni Cristina nga si Glenn Molato Pacana, 34 anyos nagpasalamat sa Labaw’ng Makakagahum, Governor Uy ug ni Ms. Crisostomo.

Matud pa ni Glenn nga ug dili gumikan ni Governor Uy dili sila makaadto sa Vicente Sotto Memorial Medical Center diin didto gitambalan ang iyang inahan.

Nagpasalamat usab siya sa pinansyal nga ayuda ni Cong. Labadlabad, ni Ms Malou Antiquina diin ug dili agi niya, dili sila makaduol ni Ms. Crisostomo kinsa wala sila pasagdahi hangtud sa ilang pagpauli dinhi sa Agosto 20 niining tuiga.

Gipasalamatan usab niya si Mr. Rommel Jamolod sa Provincial Health Office kinsa mitabang sa ilang papel pabalik dinhi sa Dipolog.
Si Cristina gitambalan ug gibalik pagplastar ang migawas sa iyang pwerta didto sa Vicente Sotto Memorial Medical Center diin walay nabayaran maski piso human niini.

Nasayran nga si Cristina ang nagtrabaho kini isip usa ka cook sa nasud sa Qatar kaniadto maoy hinungdan sa iyang gihambin nga sakit ug giantus niya kini sulod sa duha ka tuig.

Una siyang nagpalantaw sa iyang sakit dinhi sa Dipolog, apan gipangayuan kini ug P200,000 aron ma-operahan.

Bisan paman nagtrabaho siya kaniadto sa Qatar, nahubsan siya sa salapi gumikan sa pagpabarug sa iyang balay uban sa tabang sa iyang anak tungod kay walay bana nga mitimbang kaniya.

Sa pagkakaron, maayo na ang kahimtang ni Cristina kumpara kaniadto nga maglisud ug pangihi ug pagpagawas sa iyang hugaw.

(Source: Provincial Information Center- Zamboanga del Norte Facebook page)

- Advertisement -

Leave a Reply

- Advertisement -

Related Articles

- Advertisement -
- Advertisement -

Latest Articles

- Advertisement -