Cebu City – Nakatala ang Department of Health o DOH-7 og 60 ka bag-ong nagpositibo sa Coronavirus disease o COVID-19 sa Central Visayas sa miaging adlaw ug sa maong gidaghanon, 52 ang gikan sa Cebu ug walo sa Bohol.
Ang uwahing mga kaso sa Sugbo naglangkob sa 33 sa Cebu province, 12 sa Cebu City, unom sa Lapu-Lapu City, ug usa sa Mandaue City.
Pagka karon, miabot na og 20,509 ang tanang nataptan sa Covid 19 sa rehiyon apan 1,616 lang ang nagpabiling aktibo.
Kadaghanan sa aktibong mga kaso gikan sa Cebu samtang 147 sa Bohol ug 47 sa Negros Oriental.
Gipakita usab sa data sa DOH nga ang uwahing ihap sa aktibong mga kaso mas taas kon itandi sa 1,597 nga natala niadtong Lunes.
Sa pikas bahin, nakatala usab ang DOH 7 og 41 ka bag-ong naulian sa mga pasyente sa Covid 19 sa rehiyon ug kini pulos taga Cebu.
Gilangkoban kini sa 24 sa Cebu province, 10 sa Mandaue City, ug pito sa Cebu City.
Tungod niini, nakatala na ang region 7 og 17,646 ka recoveries. (Jhon Tadlip/ JTY)
(Source: DOH 7)