Nitala na og pito (7) kabuok indibidwal ang nakabsan sa kinabuhi sa dakbayan sa Heneral Santos gumikan sa COVID-19 kon COVID-19 related death. Basi kana sa talaan sa Department of Health sa Rehiyon Dose kagabii. Samtang, ang probinsya sa Sarangani ang may duha (2) na ang namatay, duha (2) pud sa South Cotabato, tulo (3) sa Sultan Kudarat, usa (1) sa North Cotabato ug usa (1) sa Cotabato City.
Gideklara na usab sa DOH Region 12 nga aduna nay local transmission kon pagtakdanay og Coronavirus sa tulo(3) ka lugar ug kana mao ang Gensan, Polomolok, South Cotabato ug Isulan, Sultan Kudarat.
Sa Sarangani Province, ang duha nga namatay ang may koneksyon sa Gensan Fishport. Una, ang helper taga-Maasim nga ang mga amo ang may panagatan. Ang ikaduha, taga-Alabel nga usa pud ka fish vendor.
Walay gikataho sa Sarangani nga nireklamo ang mga pamilya nga dili COVID-19 ang hinungdan sa kamatayon sa ilang kabanay, hinungdan nga lehitimo ang hisgutanan sa Coronavirus nga gikinahanglang magmatngon samtang dili pa ulahi ang tanan.
Ang active cases sa Sarangani sa kasamtangan ang anaa sa 33 kabuok ug 73 ang nanga-ayo. Ang Gensan ug South Cotabato ang sobra gatos ang mga active cases.
Padayon lang ang panawagan nila Governor Steve Chiongbian Solon ug Provincial Health Officer Doctor Arvin Alejandro sa pagsuporta nila Senador Manny ug Congressman Ruel Pacquiao, Vice Governor Elmer De Peralta, tanang board member ug mga mayores, nga muduol ang mga katawhan sa ilang health center ug municipal hospital kung adunay gibatyag sa lawas aron dayon matabangan. Sa gideklara nga local transmission, dili na layo matud pa nga matakdan og COVID-19.
Balik full operation na ang Maasim Municipal Hospital. Ang mga granular lockdown sa Maasim ang gitangtang na usab, apan padayong gitutukan ang mga pamilya sa namatay nga helper ug ang gialagaran niini nga fishing group.
Nagpatuman og purok lockdown ang Kayupo ug Lomuyon sa Kiamba gumikan sa mga nag-positibo nga mga residente nga ang travel history mao gihapon ang Gensan Fishport. Purok lockdown pud ang gipatuman karon sa Poblacion, Malapatan, ang travel history sa nag-positibo Gensan Fishport gihapon.
Gitangtang na ang localized lockdown sa Poblacion, Alabel human nag-negatibo sa swab test ang mga direct contact sa maong fish vendor. Apan kagabii, gideklara ni Mayor Nonoy Salarda nga lockdown na usab sa duha (2) ka simbahan sa Poblacion ug Kawas aron sa ipahigayon nga contact tracing ug disinfection.
Dili katiaw-tiawan ang COVID-19. Kung simbako sobra pa sa asymptomatic ug mild symptoms ang maangkon, dal-on ang pasyente sa hospital. Mag-inusara sa sulod sa room walay pamilya makaduol gumikan makatakod ang balatian. Kung dili kaagwanta sa bagsik sa virus, cremation, sunugon dayon ang lawas dili na gani malamayan.
Nisulod sa balay-tambalanan nga walay kauban, mugawas pud kini nga abo na lang ang makita sa nahabiling pamilya. Kasagaran sa mga nangamatay ang may sakit ng daan, apan paspas pa silang nakutluan og kinabuhi tungod sa Coronavirus infection. Maong amping ug tumanon sa tanang higayon ang mga safety protocols nga dugay ng ginabalik-balik sa gobyerno aron dili matakbuyan. (Sarangani Public Information Office)