Inay nga mopalit og kaugalingong cold chain storage, plano na lamang sa General Santos City ang mag-renta og pasilidad nga pwedeng kabutangan sa suplay sa Covid-19 vaccines.
Sa usa ka pamahayag, gikumpirma ni City Administrator, Atty. Arnel Zapatos nga gisugdan na nila ang bidding process sa lease o rental sa gikinahanglang ultra-low temperature freezers.
Dugang pa sa opisyal, adunay available nga pasilidad ang usa pribadong kompaniya nga kayang mo-akomodar sa storage requirement sa mga bakuna, sama sa Pfizer-BioNTech, gani, dili na kinahanglan pa ang pagpalit niini.
Atol sa naunang pakighinabi kang City Councilor, Atty. Franklin Gacal, gikumpirma sa chairman sa SP committee on finance nga adunay gigahin nga P30-million supplemental budget ang Sangguniang Panlungsod nga magamit sa gikinahanglang cold chain facilities sa siyudad. (John Rey Somido)