IMANDO-AN ni Gensan City VICE MAYOR/SP PRESIDING OFFICER ATTY. JOSE EDMAR YUMANG ang upat (4) ka Komitiba sa Sangguniang Panlungsod (SP) nga maglusad og JOINT PUBLIC HEARING.
Kini gilangkoban sa Committee on Laws and Ordinances nga gidumala ni Gensan City Councilor, ATTY. FRANKLIN ‘JENG’ GACAL JR; Committee on Sanitation and Environment ubos sa pagdumala ni City Councilor ELIZABETH BAGONOC, ingon man ang gihuptang Komitiba nila City Councilor JOEY DINOPOL ug lain pang usa (1) ka Konsehal.
Kana aron sayron ang re-aksiyon ug sentimento sa publiko o katawhang Heneral sa giduso karon sa Local Goverment Unit sa General Santos (LGU), Gensan nga mopahamtang og “septage fee” sa wala pa gikabutyag nga kantidad nga kolektahon tipon sa monthly billing sa General Santos City Water District.
Kini kabahin sa “Septage Management Program” sa LGU-Gensan kaabag ang buhatan sa Water District ning s’yudad nga gisugdan na pagpatuman sa nasampit nga buhatan, subay sa tubag sa representante sa Gensan Water District dihang gipangutana sa Konseho ning dakbayan.
Pero alang kang City Councilor, Atty. Gacal nga gi-uyonan usab ni Vice Mayor Yumang nga dili pa pwedi ipa-implementa o ipatuman ang ‘Septage Fee” samtang wala pa’y namugna o natukod nga dakung septage treatment plant ang LGU-Gensan, diin didto unya ibutang ang tanang hugaw nga nasuyop o nakuha sa taga poso-negro gikan sa lain-laing panimalay o establisemento ning dakbayan.
Butyag ni Konsehal Gacal, sumala sa dugay nang Memorandom Order o kamando-an sa Department of Interior and Local Government (DILG) National nga kinahanglan gayud ang pagmugna’g proper septage management system/treatment plant sa matag-lokal nga gobyerno.
Sama lamang kini sa basura nga dili pwedi mangolekta sa maong mga hugaw kung wala pa’y landfill o opisyal nga labayanan og mga basura sa tibuok s’yudad gikan sa tagsa-tagsa ka panimalay sa mga residente sa Gensan.
Busa, mando ni Vice Mayor Yumang kinahanglan nga molihok na sa labing dali nga panahon ang upat (4) ka Komitiba, aron masuta sa kinabuk-ang Konseho kung uyon ba o dili ang publiko sa naasoy nga panukala.