Gipalig-on sa buhatan sa Department of Agrarian Reform (DAR) ug ang National Commission on Indigenous Peoples (NCIP) ang ilang koordinasyon aron maseguro ang pagpanalipod sa Agrarian Reform Beneficiaries (ARBs) samtang gitubag ang pag-angkon sa yuta sa mga lumad sa Barangay Delucot, Godod, Zamboanga del Norte,niadtong Enero 20,2026.
Ang dayalogo gihimo isip tubag sa mga aplikasyon sa pagpanag-iya sa yuta sa mga lumad nga katawhan (IPs), nga ang uban niini naglangkob sa mga yuta nga sakop sa repormang agraryo.
Ang mga representante sa DAR ug NCIP, kauban ang mga opisyal sa lokal nga gobyerno ug mga lider sa komunidad sa lumad, naghisgot sa mga isyu nga may kalabotan sa hurisdiksyon ug pag-align sa mga palisiya sa yutang kabilin ug mga lugar sa repormang agraryo.
Ang lakang nagtumong sa pagpugong sa panagbangi sa yuta, pagpanalipod sa seguridad sa mga ARBβs settlement ug pagpanguma, ug pagsiguro sa padayon ug malinawon nga produksyon sa mga umahan.
Gipasiugda sa diskusyon ang patas nga proteksyon sa mga katungod sa mga IP ug ang mga lehitimong katungod sa mga ARB subay sa kasamtangan nga mga balaod.
Ang DAR mipahayag nga importante nga adunay klaro nga kahimtang sa yuta ug mga utlanan aron mapanalipdan ang mga ARB gikan sa posibleng pagpalayas, kawalay kasigurohan, ug malungtarong panaglalis nga makaapekto sa ilang panginabuhian.
Gipasalig usab sa ahensya ang padayon nga pakigtambayayong sa NCIP aron mamentinar ang seguridad sa pagpanag-iya sa yuta ug malungtarong kalig-on sa panginabuhian sa mga mag-uuma.
Samtang, gipasabot sa NCIP ang katungod sa mga lumad ubos sa Indigenous Peoplesβ Rights Act (IPRA), lakip ang pag-ila sa ilang yutang kabilin. Sumala sa NCIP, ang tin-aw nga pag-ila niining mga yutaa makatabang sa pagpakunhod sa mga panagbangi ug pagdala sa kalinaw ug kahusay sa mga komunidad sa IP ug ARBs.(MEDALYN U. BORJA)
Source: DAR ZAMBONORTE