Gikumpirma sa Matalam Municipal Police Station nga 4 ka magparyente ang nakabsan sa kinabuhi sa nahitabong pagpamusil kagabii Enero 29, sa Sitio Israel, Barangay New Abra, Matalam, Cotabato.
Giila ang mga biktima nga sila si:
1. Rashid Sahay Mampo (19 anyos) ,
2. Rica Jane Maidlos (18 anyos),
3. Daryl Mampo Diansay (16 anyos), ug
4. Russel Kim Mampo Diansay (11 anyos).
Sa Tahu ni Matalam PNP Deputy Chief Police Lieutenant Bonel Cabuyao, gibutyag niini nga gilayong miresponde ang ilang pwersa kaalayon ang Armed Forces of the Philippines (AFP) ug 40th Infantry Battalion, apan wala dayon masayri ang lugar sa insidente gumikan anaa pa kini sa bukirang bahin sa barangay.
Dugang pa ni Cabuyao, ang mga biktima nagsakay sa usa ka motorsiklo pauli na unta gikan sa Sitio Israel sa dihang gipamusil nga miresulta sa hinanaling kamatayon sa upat apan ang ika lima nadala sa Provincial Hospital sa Amas.
Gikumpirma usab sa pulisya na lakip sa mga namatay ang usa ka maguuma ug ang asawa niini, samtang ang duha mga menor de edad, out of school youth, ug parehong mga Bangsamoro.
Ang ikalimang biktima nga naka luwas mao ang 14 anyos nga nagpaalim na karon sa balay tambalanan.
Gipaklaro usab sa PNP nga dili makunsedirang ambush ang insidente gumikan wala pay kasigurohan kung unsa ang motibo sa pagpamusil.
Sa karon padayon ang makuting imbestigasyon sa kapulisan lakip na ang gipahigayong manhunt operation aron madakpan ang mga sad-an ug mapanubag sa gibuhat nga kremin.