Malampusong naluwas sa City Environment and Natural Resources Office (CENRO) ang usa ka juvenile nga Black-Crowned Night Heron (Nycticorax nycticorax), nga mas nailhan sa lokal nga ngalan nga Lapay. Human sa husto ug maampingong pag-assess sa kahimtangan sa langgam, kini gipagawas balik sa iyang natural nga puypuyan niadtong Enero 29, 2026.
Sumala sa CENRO, ang Lapay usa ka crepuscular nga matang sa langgamโnagpahulay kini sa mga kahoy ug tanom duol sa mga lawas sa tubig sa buntag ug hapon, ug mahimong aktibo sa gabii alang sa pagpangita og pagkaon. Kasagaran kini makita sa mga latian, baybayon, ug umahan sa humay.
Giklasipikar ang maong espesye isip Least Concern (LC) sa IUCN Red List of Threatened Species, apan bisan pa niini, kini gihapon protektado ilalom sa Republic Act No. 9147 o ang Wildlife Resources Conservation and Protection Act, nga nagdili sa ilegal nga pagdakop, pagpanag-iya, ug pagdaot sa mga ihalas nga hayop.
Gipahinumduman sa CENRO ang katawhan nga magpadayon sa pagpanalipod sa wildlife ug dayon ipahibalo sa mga awtoridad kon adunay makit-an nga nasamdan o naligaw nga ihalas nga hayop.(IKEN B. GULLEM)
Source: Dipolog ENRO