HUMAN pormal nga namugna ang Bantay Kuryente Movement kagahapon sa buntag, Enero 29, 2026 dinhi sa dakbayan sa Gensan aduna karon sila’y gipasibaw mga butang nga angay hatagan pagtagad ug importansiya.
Ang naasoy nga mga hangyo sa nasampit nga Kalihokan, gilangkoban ning mga mosunod:
1. Kanunay ug kalit nga brownout
Kanunay na gyud ang kalit nga pagkawala sa kuryente nga walay pahibalo.
Gusto mi mangayo ug klaro nga tubag bahin sa:
unsay hinungdan sa mga brownout
unsa na ang gibuhat ug buhaton aron masulbad ni nga problema
2. Klaro ug abli nga pinansyal nga impormasyon
Naghangyo mi nga ipahibalo sa publiko ang mosunod:
audited financial reports sa miaging tulo (3) ka tuig
kasamtangang utang ug uban pang obligasyon sa kooperatiba
kahimtangan sa power supply agreements ug mga bayranan
resulta sa internal audit
3. Transparency sa privatization o joint venture nga mga hisgotanan
Kung adunay plano nga i-privatize, ipasa ang operasyon, adunay takeover, o mosulod sa joint venture, kinahanglan:
a.) ipahibalo kini sa publiko sa klaro ug detalyado nga paagi
b.) adunay una nga konsultasyon nga gikinahanglan sa balaod uban sa mga MCOs
c.) adunay klarong pagtandi ug pag-analisa sa tanang opsyon ug mga alok
d.) iila ug respetohon nga ang kabubut-on sa mga MCOs maoy labing importante sa maong desisyon
4. Kinahanglanon nga public consultation
Gipangayo namo nga sundon ang demokratikong paagi sa pagdesisyon. Sa dili pa aprobahan ang bisan unsang dakong kausaban sa istruktura, ang SOCOTECO II kinahanglan:
a.) magpahigayon ug assembly sa matag distrito nga abli sa tanang MCOs
b.) motugot nga adunay independent experts nga mopresentar ug neutral nga assessment
c.) maghatag ug sinulat nga impormasyon nga sayon masabtan sa ordinaryong member-consumer
d.) respetohon ang prinsipyo sa kooperatiba: ang member-consumers ang adunay katapusang tingog
5. Sayon ug tukmang pagtukod sa usa ka coordination body
Aron maibalik ang pagsalig sa publiko, ang SOCOTECO II kinahanglan motugot sa paghimo ug usa ka joint monitoring group nga maglangkob sa mga representante gikan sa:
a.) SOCOTECO II management
b.) mga MCOs
c.) business sector
d.) civil society organizations ug
c.) mga technical experts
Kini nga grupo kinahanglan hatagan ug gahum nga maka-access sa mga dokumento, makahatag ug reaksyon sa mga desisyon sa board, ug makapagawas ug report para sa publiko.
6. Panalipod batok sa politikal nga pagpanghilabot
Gikondenar namo ang bisan unsang pagpanghilabot sa mga gawas nga grupoβahensya sa gobyerno, korporasyon, politiko, o indibidwalβnga nagpaningkamot pugson ang SOCOTECO II sa mga desisyon nga dili mosubay sa kabubut-on sa mga MCOs.
Gipangayo usab namo nga tanang negosasyon nga naglakip sa NEA, pribadong korporasyon, o mga politikal nga personalidad idokumento, ipahibalo sa publiko, ug ipailalom sa public scrutiny.
7. Pagdangop sa legal nga pamaagi
Sa katapusan, kung wala mi makadawat ug positibong tubag sulod sa kinse (15) ka adlaw gikan sa pagdawat niini, ug/ o kung mahibaloan namo nga adunay buhat nga supak sa balaod, by-laws, ug konstitusyon sa kooperatiba, dili kami magduha-duha nga modangop sa legal nga pamaagi aron mapanalipdan ang among mga katungod isip mga co-owner.
Kini nga mga hangyo, ipadangat matud pa unya sa Bantay Kuryente Movement ngadto mismo sulod sa buhatan sa SOCOTECO-II ug atangan lang kung unsa ang mamahimo nilang tubag ug aksiyon. (Rem Agdon)