General Santos City – Human wala gi-aprubahan sa konseho ang Franchising Regulatory Ordinance para sa paghatag ug prangkisa sa mga tricycle nga unang giduso ni Gensan City Councilor Dominador Lagare Jr, chairman sa komita sa transportasyon sa boto nga 4-8, pabor sa oposisyon.
Sumala niya nga nauna nga napasar sa una ug ikaduhang pagbasa ang maong sugyot balaudnon, apan pag-abot sa ika-tulo ug pinal nga pagbasa, nagbutyag matud pa ang mayorya nga tun-an una ang maong sugyot ug nangayo ug minutes of the meeting sa mga nahisgutan sa milabay nga ikaduhang pagbasa.
Dako ang iyahang pagtuo nga gina-delay sa ubang konsehal ang maong ordinansa aron ma-delay usab ang pag-release sa mga prangkisa. Dugang pamahayag ni Kagawad Lagare nga ang maong Franchising Regulatory Ordinance maoy magsilbing giya sa MTFRB ug sa Sangguniang Panlungsod aron sa paghatag ug prangkisa ngadto sa Kooperatiba ug sa mga
indibidwal nga nag-apply.
Saysay niini nga ang mayorya maoy nangayo sa maong Franchising Regulatory Ordinance, apan karon nga adunay gilatag, wala nila gi-aprubahan. Sa karon, ilaha pang ginatun-an ang musunod nila nga lakang ug ginakonsidira nga mga legal nga aksyon aron
ma-aprubahan ang maong sugyot balaudnon.
Kalabot niini, gibutyag ni Kag. Lagare nga nikalampag na ang mga driver ug operator nga hangtud karon wala pa nahatag ang mga prangkisa gumikan sa pagdelatar sa pag-apruba sa maong Franchising Regulatory Ordinance.
Sa karon, wala pay na-release nga bisan usa nga prangkisa ngadto sa tulo ka mga kooperatiba ug bisan na sa mga indibidwal nga nag-apply.
Sa kasamtangan, anaa lang sa kapin 3mil nga mga tricycle sa Gensan ang gadagan nga may mga prangkisa kung asa kini ang mga prangkisa nga nahatag pa sa milabay nga administrasyon nga mga pa-expire. (Fred Degala)