General Santos City – Tumbok na sa kapulisan ang usa sa mga suspek sa pagpamomba sa Yellow Bus Line (YBL) sa Tacurong City niadtong Domingo, Nobyembre 6, 2022.
Nailhan ang usa sa mga suspek human sa gihimong makuting imbistigasyon sa Special Investigation Task Group (SITG) kansa maoy nagtutok sa kaso.
Nasayran nga migawas sa ilang gihimong imbistigasyon nga ang usa sa samdan sa maong pagmusikad nga si Esmael Daomilang y Tamama, 55-anyos kansa naputlan ug tiil maoy usa sa mga suspek sa pagpabuto ug bomba.
Gilayon usab nga gipasaakaan ug kaso ngadto sa Prosecution Office ang suspek particular ang kalapasan sa RA 11479 (Anti-Terrorism Act of 2020).
Padayon usab ang paggukod sa kapulisan sa uban pang kaaubanan sa suspetsado.
Dungan niini gidayeg ni Police Brigadier General Jimili Macaraeg, PRO 12, Regional Director, ang paspas nga pagresolba sa SITG ilawom sa pagpanguna ni PCol. Rogelio Raymundo Jr. sa maong pagpamomba.
Kahinumduman nga usa ang patay samtang 11 ang samdan sa pagbuto sa bomba sulod mismo sa YBL Bus sa Tacurong City niadtong Domingo alas 11:30 ang takna sa buntag.
Gipaniguro usab ni Police Brigadier General Jimili Macaraeg, nga padayon ang ilang pagpatuman sa hugtanong seguridad sa tibuok rehiyon aron nga matumbok ang mga kaubanan sa suspek.
(Source: PRO 12 | PCADG 12)