General Santos City–Nakatakdang magpahigayon ug turn over of command karong adlaw ang General Santos City Police Office alang sa bag-ong city director sa GSCPO nga si Police Col. Alexis Yap ug outgoing city Director Police Col. Paul bometivo.
Sumala kang Col Bometibo nga dako ang iyahang pagpasalamat sa katawhan sa dakbayan gumikan sa suporta nga gihatag kaniya sa kapin siyam kabulan niining paglingkod isip labaw sa kapulisan sa syudad.
Saysay niya nga ilalom sa iyang pagdumala, napa-ubos ang crime rate gikan Enero hangtud karong bulana kung itandi sa milabay’ng tuig.
Dugang pamahayag ni Police Col. Bometivo nga siya nanghinaot nga ilalom sa pagdumala ni Police Col. Yap, magpabilin ang maliwon nga peace and order sa Gensan.
Nagtuo hinuon kini nga gumikan sa kapasidad ni Col Yap mahimo niini ang iyahang tahas isip bag-ong labaw sa General Santos City PNP.
Awhag niini sa mga pulis sa Gensan nga ipabilin ang suporta ngadto sa bag-ong labaw sa kapulisan sa dakbayan ug suportahan ang unsa mang programa alang sa kaayuhan sa katawhan. (Alfredo Madas Jr.)