KASONG may kalabotan sa iligal nga paghupot sa armas ug bala unya kasong may kalabotan sa paghupot ug gidiling druga ang posibleng atubangon sa mga nadakpan sa kapulisan human sa gi-flash alarm nga pagpanulis sa Barangay Bula kaadlawon sa adlaw Hulyo 3, 2022.
Subay sa report sa San Isidro PNP aduna silay nadakpan sa Conel Road, Barangay San Isidro nga silang Vincent Maraon Salazar, lalaki,19- anyos walay trabaho nga nagpuyo sa Purok 13-A Barangay Katangawan, John Lei Lambid Frasco, lalaki,18- anyos ulitawo, walay trabaho ug taga Purok 13-A Barangay Katangawan, Christian Calderon Caspillo, 18- anyos lalaki ulitawo, walay trabaho ug taga purok 19, San Vicente, Barangay Lagao.
Sumala pa pasado ala una sa kaadlawon nanawag ang City Tactical Operation Center CTOC-GSCPO adunay flash alarm nga adunay pagpanulis nga nahitabo sa Damicog Street, Barangay Bula unya ang gitudlong responsabli nakasakay sa single nga motorsiklo ang sakay nakasul-ob ug itum nga tshirt, maroon nga short unya green nga kalo samtang ang angkas nakasul-ob yellow nga t-shirt unya blue nga short pants unya adunay sling bag.
Ang laing kauban nakasakay sa itum nga Rusi nga motorsiklo naka sul-ob itum nga sando unya blue nga maong nga pantalon.
Sa pagpanguna ni PCPT Ulf M. Tabucon kuyog ang ubang pwersa sa kapulisan naghimo sa ginatawag nga dragnet Operation unya nagbutang ug checkpoint sa Conel Road.
Sumala pa nga niagi ang duha ka motorsiklo unya may susama nga hulagway sa gi-flash alarm mao nga gipahunong sa kapulisan ang mga sakay.
Atol sa pagkapkap sumala pa nakuha ang mga items sama sa tulo ka putos sa plastic sachet nga gidudahang shabu ang sulod, usa ka .38 revolver nga adunay serial number 814C7, may upat ka bala,may nakuha usab nga usa ka hand grenade Fuze M204A2 unya may kwarta nga mokabat sa P2,170.
Ang laing nakuha sumala pa duha ka sling bag, usa ka unit sa kolor itum nga cellphone keypad, unya duha ka unit kolor pula 125 nga motorsiklo walay plaka numero, apan adunay chasis number.
Ang nakuha nga gidudahang gidiling druga unya ang armas, bala i-submit sa Regional Forensic Unit alang sa dugang pagsusi, samtang ang granada nahatud na sa EOD-GSCPO.
Ang duha ka motorsiklo ipasusi pa ang record sa Land Transportation Office kon unsay kasupakan sa balaud.
Samtang ang mga dinakpan gidala na sa Dr. Jorge P. Royeca Hospital aron mahiling ang panglawas ayha gibutang sa Kustodiya sa presento kwatro samtang gina andam ang ilang mga kaso.
Kahibaluan nga subay sa report sa Bula Police Station pasado alas otso sa gabei Hulyo 2 niadto sa ilang estasyon silang Romy Soto Galo, 28-anyos, ulitawo may trabaho, nagpuyo sa Purok Islam ug si Michelle Nebaria, 24- anyos nga taga EMB Homes, Labangal.
Sumala pa nga samtang sila anaa sa Damicog Street may duha ka motorsiklo nga may mga sakay nga nitapad kanila unya nideklara ug tulis gamit ang wala matino nga kalibre sa armas.
Ang gikuha daw sa ilaha ang usa ka cellphone unya ang salapi nga mokabat sa P4,800, gipa-flash alarm usab dayon sa presento sais.