General Santos City – Malampusong gipahigayon kagahapong adlawa, Pebrero 3, 2025 ang Ceremonial Launching and Unveiling sa Tourism Information Digital Interactive Kiosk.
Gihimo kini human sa Flag Raising Ceremony sa LGU-Gensan sa pagpanguna ni Gensan City Mayor Lorelie Pacquiao, kauban ang mga opisyal sa lokal nga kagamhanan, Department of Trade and Industry (DTI), ug Department of Tourism (DOT).
Kini nga proyekto kabahin sa mga lakang sa LGU-Gensan aron mas mapalig-on pa ang reputasyon sa General Santos City isip dakong destinasyon sa turismo ug negosyo.
Nasayran, nga aduna karo’y lima (5) ka unit sa digital kiosk nga ibutang sa lain-laing lugar ning dakbayan, partikular na sa City Hall Lobby, Airport Arrival Area, Bulaong Terminal Visitors Lounge, Investment Action Center Building, ug sa umaabot nga Gensan Tourism Hub.
Kini nga mga Kiosk magsilbi nga giya sa publiko sa mga importanteng impormasyon kalabot sa turismo, negosyo, ug uban pang serbisyo sa gobyerno.
Ang mga digital kiosk magpakita usab sa mga dagkong atraksyon, kapuy-an, ug pinakabag-o nga balita sa siyudad.
Pinaagi niining bag-ong teknolohiya, ang impormasyon mahimong mas kaylap nga magamit sa mga turista, mamumuhunan, ug mga residente sa siyudad. (Rem Agdon)
News&Photos: CMO