General Santos City – Gunit na karon sa Police Station 4 ang gitudlong suspek sa pagkawat sa motorsiklo nga panag-iya ni Ruel Goloran Jr., nga taga Agusan Del Sur ug temporaryong nanimuyo sa Barangay Mabuhay ning syudad.
Kahinumduman nga nagviral sa social media ang suspek human kining navideohan sa usa ka vlogger dihang gitulod niini ang motorsiklong kinawat sa may Nuñez Street, Barangay San Isidro, alas 5:00 sa kaadlawon.
Matud ni Ruel Goloran Jr. niadtong Byernes sa hapon, giturnover matud pa sa magtiayong taga Brgy. Lagao nga maoy ginapuy-an sa suspek ang maong batan-on tungod nabalaka sila nga maangin sa gihimo sa bata.
Gilayon usab nga giadtoan sa tag-iya sa motor ang police station diin iyang nakumpirma nga mao gyud ang mikawat sa motorsiklo.
Bisan ang siklista ug vlogger nga si Rener nga maoy misita o mi-video sa suspek atol sa pagpangawat niini mikumpirma ug mi-ila nga ang maong batan-on gyud ang mihimo sa pagkawat sa motorsiklo.
Samtang ang suspek, walay duha-duha nga iyang giangkon ang maong sala apan iyang gikanayon nga igo lang siyang gisugo sa wala pa niini hinganli nga tawo. (Alfredo Madas Jr.)