General Santos City–Giklaro ni Cora Tito sa City Economic Management And Development Office kon CEMCDO nga nalakip sa MOA kon Memorandum Of Agreement sa Gensan ug Sister City nga ipangalan ang usa ka dalan o lugar sa syudad sa mga sister city.
Tungod niini nahimo ang Hadano Park, Gensan-Hadano Friendship Garden, ingon man ang Jersey, U.S.A Street. Saysay niini nga dihang na-aprubahan ang maong mga pangalan, wala silay nadawat nga unsa mang reklamo gikan sa publiko.
Sumala niya nga pinaagi sa sisterhood agreement, ubay-ubay ang mga benipisyo nga nakuha sa Gensan, gani ang panggamhanan sa Hadano City, Japan maoy naga-maintain sa lugar kung asa nakapangalan ang ilahang syudad.
Pag-angkon ni Tito nga daghan silag nadawat nga negatibong komento kabahin sa maong lakang, apan giklaro niini nga ang ubang problema sa syudad sama sa transportasyon, adunay laing ahensya ang naghupot niini ug dili kini lakip sa mga trabaho ilalom sa CEMCDO, ug ang pag-ilis sa pangalangan sa mga gagmay nga dalan ang usa sa ilahang mga programa.
Saysay niini nga ang pag-ilis sa mga pangalan sa pipila ka dalan sa syudad ang sugod pa lang sa mas daghan nila nga plano sama nalang sa exchange of education kung asa usa kini sa mga sinugdanan nga ilahang nakita aron mubobo ug investment ang mga sister city.
Kahibaluan nga sa karon, anaa sa 12 ka mga syudad sa nasud ug pito ka mga syudad international ang mga nahimong sister city sa Gensan.
Dugang pamahayag ni Tito nga bisan pa man ug gilatag na sa hawanan sa konseho ang planong pag-ilis sa mga pangalan sa mga dalan sa syudad, dili kini pasabot nga kini i-implementa dayon.
Mu-agi pa kini ug proseso sama sa public hearing, consultation ug daghan pang uban, rason nga dili angayang masuko ang publiko ngadto kaniya o sa buhatan sa CEMCDO. Higayon matud pa nga dili kini ma-parubahan, wala silay mahimo.(Alfredo Madas Jr.)
