Hapit duha ka buwan human milingkod isip Regional Director sa Police Regional Office (PRO) 11, si Police Brigadier General Aligre Lamsen Martinez girelibohan sa iyang katungdanan.
Si Martinez gikan sa PRO 4A (CALABARZON) kinsa mipuli kang Brigadier General Alden Delvo sa dihang miretiro siya niadtong Abril 25, 2024.
Kung kahinumdoman, 35 ka mga police officials sa Davao City Police Office ang unang gi-relieve sa ilang posisyon.
Kini base sa kamanduan nga giluwatan ni PBGen. Martinez nga gipetsahan Mayo 24, 2024.
Sa maong kamanduan, epektibo niadtong Mayo 22, girelieve ang kapulisan, lakip ang unom ka station commanders, ug City Director Col. Richard Bad-ang.
Si Police Brigadier General Nicolas Deloso Torre maoy nihulip kang Martinez ug gidestino sa Police Holding and Accounting Unit (PHAU), ubos sa Directorate for Personnel and Records Management (DPRM).
Ang pag-relieve sa posisyon nahitabo kang Gen. Martinez human sa pagronda sa propyedad ni Kingdon of Jesus Christ leader Pastor Apollo Quiboloy sa Davao City.
Sa laing bahin, dose (12) ka miyembro sa Criminal Investigation and Detection Group (CIDG) ug Special Action Force (SAF) sa Davao City ang girelieve ug gi-reassign sa CALABARZON region, epektibo kagahapon, Hunyo 13, 2024. (Rem Agdon)