Dako nga industriya ang poultry ug pradaksyon sa itlog sa probinsya sa Sarangani. Hinungdan nga todo-panalipod karon ang Sarangani Provincial Veterinary Office kauban ang mga municipal agriculture office, Department of Agriculture ug kapulisan nga dili makasulod ang Bird Flu.
Adunay mga commercial poultry operator sa Sarangani Province, sama na lang sa Alabel nga dise otso (18) kabuok broiler farm, dise nuybe (19) ka broiler farm sa Malungon, tulo (3) sa Maasim, duha (2) ka layer farm sa Kiamba, ug daghan pang backyard raising sa ubang kalungsuran.
Pahimangno ni Provincial Veterinarian Dr. Bernard Cababat, makanunayon nga limpyo ang palibot sa production area, dili pasudlan og mga tao nga dili mahibal-an kung asa gikan, ug dili tiwasan ang nagdu-ngoy nga mga manok, pato, ganza, bebe, pugo ug pabo gumikan makatakod sa tao ang Bird Flu.
Inay mupabalo dayon matud pa sa barangay ug municipal agriculture incharge aron masuta kung positibo kini sa virus pinaagi sa pagkuha og blood sample.
Unang nakapagawas og executive order si Governor Steve Chiongbian Solon sa pakig-alayon sa mga municipal mayor ug sa mga checkpoint aron dili makasulod-gawas sa Sarangani Province ang mga binuhing hayop.
(Source: PIO-Sarangani)