Alabel, Sarangani Province–Gibaha ang pipila ka lugar sa tulo ka barangay sa Lungsod sa Alabel gumikan sa pagbundak sa ulan.
Alas 9:00 sa gabie dihang girespondihan sa mga personahe sa Lokal nga Panggamhanan sa Alabel nga gilungkuban sa Alabel Municipal Disaster Risks Reduction and Management Office (MDRRMO), Alabel Municipal Police Station ug Alabel Fire Station ang mga residenteng naapektuhan sa kalit nga pagbaha, sa tulo ka mga barangay particular ang Barangay Ladol, Bagacay ug Kawas.
Gi-alalayan sa kapulisan, mga bumbero ug mga rescuer ang mga lumolupyo sa paghikling ngadto sa mas luwas nga lugar. Hinuon sa karon kontrolado na ang sitwasyon sa lugar.
Dungan niini gipahimangnuan sa MDRRMO-Alabel ang katawhan hilabina ang mga nagpuyo duol sa sapa ug kadagatan nga magmabinantayon kanunay.
Dili na dapat huwaton pa sa mga residente nga pelegroso na ang ilang kahimtang ayha muhawa sa ilang mga panimalay.
Ang kusog nga ulan, resulta sa ITCZ o Intertropical Convergence Zone ug adunay ginabantayan nga LPA sa habagatan nga bahin sa Mindanao.
Source: Alabel Information Office
Photo Credit to: Alabel MPS
