General Santos City – Gikumpirma sa buhatan sa Philippine Drug Enforcement Agency (PDEA) 12 nga adunay mga drug personalities nga una nang misurender panahon sa Duterte administration nga mibalik sa ilang kanhing bisyo ingon man sa illegal drug activities.
Sumala pa ni PDEA 12 Assistant Regional Director Atty. Francis Del Valle nga basi sa ilang monitoring ug sa mga nadawat nga impormasyon adunay mga mibalik sa maong bisyo nga sagad kanhing misurrender na sa gobyerno panahon sa Duterte administration.
Gumikan niini gibutyag sa opisyal nga kadtong gikaingong mibalik sa illegal drug activities ang ilang ipailawom sa validation ug kung mapamatud-an mahimo silang subject sa anti-illegal drug operation sa ahensiya.
Gipaklaro usab ni Atty.Del Valle nga ang anti-illegal drug operation nga ilang ginahimo sa karun ang dili na sama sa kanhing administrasyon nga pulos na lamang dinakpanay nga ang uban miresulta pa sa kamatayon.
Matud pa niini nga nindot ang ilang approach sa karun pina-agi sa barangay drug clearing program kung asa gina-classify sa ahensiya ang mga drug personality nga mamonitor sa mga barangay.
Gitin-aw sa opisyal nga kadtong mga biktima sa ginadiling droga hatagan ug saktong intervention sa gobyerno aron matabangan nga mabag-o ang ilang kinabuhi.
Gi-awhag na lamang sa opisyal ang publiko nga tabangan sila ug dili mahadlok nga magpa-abot ug impormasyon panahon nga dunay mahibaw-an nga mga tawo nga nalambigit sa droga sa ilang barangay.
Nagtuo si Del Valle nga dili sila magmalampuson sa ilang kampanya kontra illegal drugs kung wala ang tabang sa katawhan nga maoy labing nasayod si kinsa ang nalambigit sa ilang lugar ingon man ang mibalik sa maong bisyo.
(Source: PDEA 12)