General Santos City—Patay ang usa ka amahan human kining gipusil sa wala pa mailhing mga suspek alas 5:47 ang takna kagabie July 3, 2022 sa area sa purok Rovalgon, Barangay Calumpang, Gensan.
Subay sa Blotter report sa Police Station 5, ang biktima nailang si Joel Enciso Francisco, 37 anyos, residente sa susamang lugar.
Subay sa inisyal nga imbistigasyon sa kapulisan nasuta nga sakay ang biktima sa iyang sikad dihang siya gipusil sa duha ka mga suspek nga nakamotorsiklo gamit ang kalibre 45 nga pistola.
Nakaangkon ug samad sa ulo nga bahin ang biktima nga hinungdan sa iyang kamatayon. Ang mga suspek paspas nga misibat gikan sa lugar human sa pagpamusil.
Sa pakighinabi kang Kristine, kapuyo sa biktima, gikan sa ilang balay ang iyang leave in partner ug padulong unta sa usa niya ka costumer aron muhatod ug ligid sa truck apan wala pa kini nakagawas sa ilang purok gipusil matud pa kini sa mga suspek.
Subay usab sa iyang nahinabi nga residente sa ilang purok, dunay nisakay nga babaye sa sikad sa iyang kapuyo, human sa pipila lang ka minutos, nakadungog na sila ug buto sa pusil.
Gibutyag pa ni Kristine nga siya naglibog unsay motibo sa krimen gumikan wala man siya’y nasayran nga nakalaban ang iyang kapuyo ug wala usab siya’y nasayran nga lambigit kini sa iligal nga gimbuhaton.
Sa karon hustisya ang gipangayo ni Kristine alang sa iyang kapuyo. Unta matud pa madakpan ang suspek nga mihimo sa krimen gumikan dili tiaw ang ilang gihimo sa biktima kansa yano lang nilang gipusil.
Giangkon pa sa ginang nga siya naglibog unsaon pagbuhi sa ilang mga anak tungod bugtong ang iyang kapuyo lang ang nanginabuhi alang sa ilang pamilya.