Pipila ka mga lugar sa probinsya sa Sarangani partikular na ang Malungon ug Alabel nakasinati ug pagbaha ug pagdahili sa yuta kagahapong adlawa ang Sumala kang Joreimae Balmediano, Information Officer sa Office Of The Civil Defense 12 nga adunay mga gihimong rescue operation sa napulo ka mga barangay sa Malungon nga apektado sa pagbaha samtang duha ka mga barangay ang inisyal nga natala sa Munisipyo sa Alabel.
Subay sa insiyal nga report, gikan sa Malungon Municipal Risk Reduction And Management Office, anaa sa 47 ka pamilya ang naapektuhan sa pagbaha ug landslide samtang ginahulat pa ang report gikan sa Alabel kung pila ang pamilya nga apektado.
Dugang pamahayag ni Balmediano nga subay sa report nga ilahang nadawat kagahapon, alas 10:00 sa buntag, wala pa pay natala nga missing o casualty sa pagbaha nga nasinatian apan kagabii, base sa impormasyon nga nakuha gikan sa MDRRMO-Malungon usa ang kumpirmadong patay human nga nalumos. Ang biktima usa ka lalaki ug anaa na sa hamtong ang edad.
Ubay-ubay usab mga nga LGU ang nagdeklara ug suspensyon sa klase kagahapong adlawa gumikan sa pagbundak sa ulan ug mga dalan nga dili ma-agihan.
Sa karon, padayon ang ginahimo nga clearing operation sa DPWH sa mga dalan nga napektuhan sa pagbaha ug landslide.
(Source: Malungon Municipal Risk Reduction And Management Office | Office of The Civil Defense 12)