- Advertisement -
Maasim Sarangani Province – Bugto ang kinabuhi sa usa ka negosyante human nabangga ang gimaneho niining kotse sa mismong poste sa kuryenti kilid sa dalan nga iyang giagi-an sa Maasim, Sarangani Province niadtong Sabado sa buntag, Abril 6, 2024.
Si Police Major German Luna- ang Hepe sa Maasim PNP nag-ila sa biktima nga si John Alvin Baga-o, 31 anyos, opisyal nga nga residente sa Acharon Village, Brgy. Calumpang, General Santos City, pero didto matud pa kini nag-ulian sa ilang balay sa Maitum, Sarangani Province.
Nahitabo ang insidente sa alas-7:45 Sabado sa buntag sa Purok 5-Tinago, Brgy. Poblacion, Maasim, sa susamang probinsiya.
Asoy ni Maj. Luna, gikan sa usa ka family gathering ning dakbayan sa Gensan ang biktima ug wala matud pa kini’y tarung tulog niadtong Biernes sa gabii, hinungdang gipugngan sa iyang pamilya nga dili una mopa-uli sa Maitum, apan nagpursige gayud kining mopa-uli sa Maitum ug nabangga sa poste sa kuryenti pag-abot niini sa Maasim.
Resulta, waskag ang pangunahan nga bahin sa iyang kotse ug naka-angkon kini’g mga samad ug bun-og sa lain-laing parti sa kalawasan.
Gidala kini sa Maasim Local Hospital sa mga nagresponding mga sakop sa Municipal Disaster Risk Reduction and Management Office, apan namatay gayud kini. (Giovanni Pasco)
Photos: Ren Ren Boquecosa
- Advertisement -
