General Santos City – Patay ang suspetsado sa pagpanulis sa usa ka gadget store ning syudad nga giilang si Alfie Alferes alias Tato/Badong, miyembro sa Faisal criminal group ug nagpuyo sa Purok 2, Block 4, Fatima ning syudad. Saktong alas 6:30 sa gabii, August 19, 2023 , gi-serve ang warrant of arrest kay alias Badong human ang pagpanulis kauban sa iyang kaubanan sa usa ka gadget store sa gensan.
Samtang gisilbi ang warrant niini, kalit matud pang gipusil sa suspek ang mga operatiba gikan sa GSCPO CIU, PS4, PS9, PS7, RID12, RSOG 12, hinungdan nga mibalos ang operatiba ug napusilan si alias Badong nga adunay kasong robbery with violence against or intimidation of persons. Daling gidala pa sa hospital ang suspetsado pero gideklara kining dead on arrival.
Narekober sa GenSan PNP ang usa ka caliber .45, mga bala, magazine, 5 ka pirasong walay sulod nga box sa iphone, 1 unit sa iphone 13, 1 unit sa iphone 14 pro, mga cord, charger ug uban pa. Kasamtangan padayon pang ginapangita sa kapulisan ang ubang miyembro sa Faisal criminal group nga maoy suspek sa pag pang hold-up sa Coco Gadget Hub sa Leon Llido, Barangay City Heights ning dakbayan kaniadtong August 9, 2023.
Panawagan ni GenSan PNP City Director P/Col Nicomedes Paña Olaivar Jr, i-report dayon sa kapulisan kung adunay bisan unsang matang sa krimen nga nahitabo sa inyong palibot aron mahatagan kini ug paspas nga pagresponde ug kasulbaran./Rey G.Ombaña