General Santos City – Gikumpirma ni Kath Abad, Spokesperson sa PDEA-Regional Office 12 nga positibo sa marijuana oil ang mga nakumpiska nilang vape cartridges sa ilang tulo ka dinakpan sa gihimong buy-bust operation niadtong April 11, 2024, alas 3:35 sa hapon sa Purok Maunlad, Brgy. Apopong, Gensan.
Segun ni Kath Abad, subay sa resulta sa ilang gihimong laboratory test sa 51 ka mga vape Cartridges nga nakumpiska gikan mga suspek nga silang Juanito Cuevas II, 27 anyos , Leigh de Leon, 22, ug Cris Jay Andolana, 22, susamang taga Gensan, nagpositibo gyud kini sa illegal drugs, gani bisan na sa packaging niini, aduna gyoy naka-indicate nga duna kini content nga 1ML Marijuana oil.
Nabisto ang operasyon sa illegal nga droga sa mga suspek tungod na usab sa mas gipahugtang monitoring ug intel gathering sa PDEA sa susama niining mga gimbuhaton. Nasayran nga naga-operate ang mga suspek sa Gensan hangtud sa Polomolok pinaagi sa online.
Base sa bana-bana sa PDEA mokantidad sa 178,500.00 pesos ang nakumpiskang MJ Flavored Vapes kung asa mahagbong ngadto sa 3,500 ka pesos ang kantidad matag usa ka vape cartridge.
Sa karon, gina-workout pa sa PDEA ang source sa tulo ka mga suspek ug gikumpirma ni Abad nga dunay ginakuhaan ang mga nasampit dinhi sa Gensan apan dili una niya kini ibutyag tungod padayon pa ang ilang ginahimong validation.
Kahinumduman nga duha ka semana ang nakalabay, nagpagawas na ug pahimangno ang PDEA national office kalabutan niining MJ-Flavored Vapes nga ginabaligya sa pipila ka mga indibidwal.
Nasayran nga daghan nang susama niini ang nakumpiska sa PDEA-national sa ilang mga operasyon mao nga nagpagawas sila ug pahimangno bahin sa kadaot nga mamugna niini sa lawas sa tawo. Hugtanon usab paggamit ug marijuana dinhi sa nasud Pilipinas. (Giovanni Pasco)