General Santos City – Gipasidan-an na sa Commission on Elections nga posibling madiskwalipika ang mga kandidato alang sa Barangay ug Sangguniang Kabataan Eleksyon nga nalambigit sa premature nga pagpangampanya human gipapilit ilang mga dagway sa tarpaulin ug gisab-it sa nagkadaiyang lugar sa Barangay Dadiangas South ning siyudad sa Heneral Santos.
Sa sulat nga gipagawas ni City Election Officer Atty. Sittie Sharmaine Papandayan-Garangan, gimando niini sa grupo ni Barangay Kagawad Michael Binas nga nagpapili isip Barangay Chairman ubos sa payong sa People’s Champ Movement nga gilayong tanggalon ang ilang mga nakapaskil nga tarpaulin diin nabutang ilang mga panagway isip kandidato .
Nakita ang panagway nilang Biñas ug mga kaubanang nga kandidato sa pagka barangay kagawad nga silang Jericho Baguio, Mitzi Joy Catolico, Myraluna Dian, Michael Andrew Lee, Halim Lumna, Sheena Marie Montejo, Roland ‘Allan’ Pragados ug April Kimberly Patong kalakip kaubanang mga kandidato alang sa Sangguniang Kabataan election.
Segon pa ni Garangan nga nagpahigayon na ug imbestigasyon ang ilang buharan human makadawat ug inpormasyon sa nagkalat nga tarpaulin sa nahigutang grupo diin ilang napamatud-an ang maong sumbong. Gipaklaro sa Comelec opisyal nga ang pagpaskil ng mga tarpaulin sa gawas sa campaign period nga gitakda karong umaabot nga Oktubre 19-28 kini maikonsidera nga premature campaigning ug pagsupak sa Omnibus Election Code ug posibling madiskwalipika ang mga kandidatong nalambigit niini./Rey G.Ombaña