General Santos City – Padayon pa ang ginahimong imbestigasyon sa kapulisan sakop sa Police Station 7 human ang insidente sa pagpamusil ug pagpanigbas sa Datal Salvan, Brgy San Jose ning akbayan sa GenSan.
Subay sa report sa kapulisan alas 4 ang takna sa hapon dihang nahitabo ang insidente kung asa sakay matud pa ang biktimang si Joel San, 47 anyos nga residente sa Brgy. Mongocayo, T’boli, South Cotabato sa usa ka motorsiklo uban ang iyahang asawa nga gimanihuan sa iyahang anak dihang gi-aharagan sa suspek nga si Dusa Ugan, hamtong ang pangidaron nga brother in law sa biktima sakay sa motorsiklo nga gimanihuan sa iyahang anak nga si Jonel Ugan.
Pamahayag sa kabanay sa biktima nga pag-abot sa lugar, kalit lang mibabag sa dalan ang mga suspek ug dayon gipabuthan ug wala masutang armas.
Natumba matud pa ang motorsiklo rason nga nakadagan ang biktima apan naabtan sa mga suspek ug gitigbas makaduhang higayon nga miresulta sa iyahang kamatayon.
Paspas nga misibat padulong sa wala masutang direksyon ang mga suspek nga padayong gipangita sa kapulisan.
(Source: GSCPO)