General Santos City – Himas rehas ang usa ka lalaki human giingong nition og armas sa usa ka trycicle driver ning dakbayan mga alas 11:30 niadtong Sabado sa gabii.
Giila ang biktima nga si Johnny Bensorto Gener, 33 anyos, minyo, drayber sa traysikol ug residente sa Yumang St, Botanic, Brgy City Heights.
Base sa report, samtang nagpahigayon og follow-up investigation ang kapulisan sa Police Station 3-GSCPO ug City Mobile Force Company sa nahitabong pagpamusil sa Barangay Buayan niadtong Sabado sa gabii, nadakpan sa mga otoridad ang lalaki nga giilang si Alan Fermin Gonzaga, 38-anyos, drayber sa New Era Metal Forming Company ug residente sa Narra St, Brgy Lagao sa bahin sa San Francisco National Highway, Brgy Baluan nga target sa cal. 45 ang drayber sa trycicle.
Gidakop dayon sa kapolisan si Gonzaga ug giimbargo sa posisyon niini ang armas ingon man ang (7) pito ka buhing bala.
Ang suspek gipaubos sa paraffin test samtang ang Crime Laboratory 12 nipahigayon og ballistic examination sa armas aron masuta kon nalambigit ba ang suspek sa insidente sa pagpamusil.
Mag-atubang si Gonzaga og kasong Grave Threats ug Illegal Possession of Firearms.
(Source: General Santos City Police Office)