South Cotabato – Patung-patong nga kaso ang atubangon sa mga barangay opisyal sa Barangay Tablu sa lungsod sa Tampakan, South Cotabato gumikan matud pa sa pagwaldas sa kwarta nga gigahin sa mining firm Sagittarius Mines, Inc. (SMI) alang unta sa mga proyektong pangkalambuan sa nahisgutang Barangay. Kasong falsification of document, malversation of public funds, ug abuse of authority ang gipasakang Kaso ngadto nilang Barangay Chairperson Delfin Magbanua, Barangay Kagawad Jelyn Cale ug Barangay Treasurer Jennifer Obaña.
Sumala pa kay Barangay Kagawad Jerlyn Ferolino, isa sa mga nagpasanga-at ug reklamo, nag-sugod kini sa isyu nga ilang nadiskobre nga gipeke ang ilang mga pirma aron lamang maaprubahan ang annual budget sa barangay niadtong tuig 2020 hangtud 2022.
Gibutyag usab niini nga ang pondong gihatag sa Sagittarius Mines, Inc (SMI) sa ilang barangay ang nahurot apan wala silay nakitang nasugdan ug nahuman nga mga proyekto.
Dugang ni Ferolina, nga matud pa duna pay outstanding loan ang barangay sa isa ka bangko nga gihimong pantapal nga pambayad sa treasurer sa kwartang gihatag SMI.
Kasamtangan gituki matud pa sa Sangguniang Bayan ang isyu ug gilaumang mapagawas ang resolusyon ang natahasang komitiba sa maong hisgutanan. (Rey G.Ombaña)