General Santos City— Nangandam na ang opisina sa City Welfare And Development Office (CSWDO) sa syudad sa Gensan sa mga intervention kun lakang nga ilahang buhaton aron nga matabangan ang posibleng madisplace kon mawad-an ug panginabuhian nga mga tricycle driver ugaling hingpit nang mapatuman ang clustering sa mga tricyle sa syudad sa Gensan.
Sumala pa ni Genelen Vidanes, department head sa CSWDO nga ang madisplace nga mga driver mao kadtong dili makasulod sa tulo ka kooperatiba nga gimugna sa syudad nga pula, apple green ug puti.
Nakadawat na matud pa sila ug kamanduan gikan kang City Mayor Lorelie Pacquiao nga mangita na ug mga programa nga posibleng makahatag ug tabang sa mga ma-apektohan nga tricycle drivers.
Ilaha matud pang duolan ang Public Employment Services Office (PESO) Gensan, TESDA ingon man ang DSWD aron nga makamugna sila ug comprehensive program para sa mga nahisgutan tungod dili pwede nga mabilin sila nga walay panginabuhian.
Sa karon wala pa usay datus ang CSWDO kung pila gayud ka mga tricycle drivers ang posibleng madisplace kun mawad-an ug trabaho higayon nga ipatuman na ang maong sistema sa trasportasyon.(Alfredo Madas Jr.)