General Santos City – Buot karon nga imbestigahon ni General Santos City Councilor Jose Edmar Yumang ang gasto nga gihimo sa Department of Education-GenSan sa kontrobersyal nga Special Education Fund, kalabot sa gipahigayon nga 2023 SRAA Meet.
Dungan sa ika-32 nga regular session sa Sangguniang Panlungsod, gipahibawo ni Yumang ang nadawat nga reklamo sa iyang buhatan, may kalabotan sa giingong mas daghang “chaperons” nga mitambong sa SRAA, kon itandi sa gidaghanon sa mga sports officials ug mga atleta.
Matod sa opisyal, gawas sa mga “chaperon”, apil usab sa contingent ang mga katabang sa maong mga chaperon.
Dugang pa ni Yumang nga gipahinumdoman si GenSan Schools Division Superintendent Isagani Dela Cruz kalabot sa mabinantayon nga paggasto sa pundo sa dakbayan.
“Can you please investigate on that matter, because a bit more people are sent who should not be there,” matod sa magbabalaod.
Sa habig ni Dela Cruz, iyang gipasalig nga iyang imbestigahon ang isyu ni Yumang.
DepEd GenSan | LGU GenSan