General Santos City – Patay ang usa ka Empleyado sa Barangay human kining gidunggab sa wala pa mailhing suspek sa area sa Zone 6, Block 2, Barangay Fatima, GenSan kaganinang kaadlawon.
Subay sa Blotter report sa Police Station 7, alas 2:00 pasado kaganinang kaadlawon dihang nakadawat sila ug report gikan sa usa ka concern citizen nga matud pa adunay biktima sa pagpanunggab sa maong lugar.
Gilayon usab nga miresponde ang kapulisan diin naabtan gyud nila ang biktima nga si Ruel Planas, 49 anyos, Empleyado sa Barangay Fatima sa terrace sa iyang balay nga nagkadugo.
Gilayon kining gidala sa ospital apan gideklarang dead on arrival.
Tulo ka mga samad dinunggaban ang naangkon sa biktima sa iyang liog nga maoy hinungdan sa iyang kamatayon.
Sa karon ginasuta pa sa kapulisan ang motibo sa maong krimen ug ginasuta pa kung si kinsa ang responsable niini. (John Rey Somido)