General Santos City – Samdan ang duha ka mga lalaki human kining gidunggab sa ilang kainum alas 6:50 ang takna sa bahin sa Purok Islam, Barangay South, Gensan.
Naila ang duha ka mga biktima nga silang si Ruel Esmael, legal age ug Delmar Damalerio, 29 anyos, susamang residente sa Purok Olarte, Barangay Labangal, Gensan. Samtang giila usab ang suspek nga si Ernesto Ngoho, 53 anyos, nga taga Purok Islam, Barangay South.
Subay sa inisyal nga imbistigasyon sa kapulisan nasuta nga ayha nahitabo ang pagpanunggab, nag-inum matud pa ang mga biktima uban sa suspetsado, apan kalit lang matud pa nga gidunggab sa suspek ang biktimang si Delmar gamit ang ice pick igo sa iyang dughan.
Tungod niini, gilayon nga giuwang ni Ruel Esmael ang suspek apan siya na hinuon ang gidunggab igo sa iyang tuo nga bahin sa tiyan gamit gihapon ang ice pick.
Paspas nga gidala sa Dr. Jorge Royeca Hospital ang duha ka mga biktima aron mapailawom sa medikasyon. Samtang ang suspek gilayon usab nga nadakpan ug anaa na karon sa kustudiya sa kapulisan. (Rey Ombana)