General Santos City – Nagpaklaro ang Department of Science and Technology pinaagi ni DOST North Cotabato Provincial Director Micheal Mayo nganong wala nagamit ang hybrid electric train nga iyaha sa DOST nga unang gitugyan sa Gensan ug natanggong lang sa oval plaza sulod sa pipila na katuig.
Saysay niini nga ayha gidala sa Gensan ang maong Hydro-Electric Train, adunay mga requirements nga gipangayo sama sa SP resolution ug adoption ingong man gamiton ang maong train sa mga 4-lanes nga dalan gumikan nagkinahanglan kini ug 30-meters turning point. Kini ang na-comply sa Sangguniang Panlungsod rason nga nigasto ang DOST aron madala ang maong train gikan CEBU padulong ug GENSAN.
Apan, aduna matud pay mga butang nga wala nahan-ay sa transport sector rason nga wala nakadagan ang maong train, pasabot nga wala sa DOST ang problema ug dili sila maoy hinungdan nga wala nagamit ang maong hydro-electric train.
Dugang pamahayag ni Mayo nga wala sa DOST ang problema nga natanggong sa oval plaza ang maong hybrid electric train gumikan ilaha mang nahimo ang ilahang bahin.
Saysay niini nga kung dili gamiton sa Gensan ang maong hydro-electric train, andam mudawat niini ang ubang probinsya sama sa North Cotabato kung asa ilaha kining himuon nga usa sa ilahang mga atraksyon sa umaabot nga Central Mindanao Airport.
Samtang sa isyu nga adunay aberya dihang gihimo ang test drive sa maong train, lakip sa kontrata sa pagpahigayon ug test drive mao ang pag-ayo sa unsa mang makit-an nga problema. (Alfredo Madas Jr.)