GENERAL SANTOS CITY – Gipaambit ni Mayor Lorelie Geronimo Pacquiao ang kalipay ug paglaom uban ni Kag. Graziel Pacquiao ngadto sa mga batan-ong cancer patients sa St. Elizabeth Hospital niadtong Disyembre 18, 2023. Ang mayor nisaad nga andam siyang motabang sa Bobslor Pacquiao Foundation ug sa AMPING program sa lokal nga kagamhanan alang sa ilang maintenance nga mga tambal ug laboratoryo. Andam usab siya nga mopahulam og sakyanan kon kinahanglan silang magpa-check up sa Davao City. Mapasalamaton usab kaayo si Dr. Caksy Domingo inabagan ni Mayor Pacquiao. Matud pa niya, “For the past 13 years, this is the closest we got to the LGU.” Makatandog ang talan-awon dihang giduol sa mga bata si Mayor Lorelie Pacquiao, Kag. Graziel Pacquiao, Dr. Domingo, ug mga sponsor gikan sa Philippine Association of Medical Technologists, ug sa Philippine Society of Medical Technology Students sa paghatag ug mga bulak ug mga sulat sa pasalamat. Nalipay pag-ayo ang mga ginikanan sa mga cancer patients dihang gipahibalo ni Mayor Pacquiao nga mohatag siya og cash assistance nga P5,000 sa matag bata nga ilang magamit sa pagpatambal.